martes, 29 de junio de 2010

Cataluña, o TC e nós

Finalmente, catro anos despois de ter sido aprobado polo pobo catalán, o Tribunal Constitucional español vén de desestimar, na súa maior parte, o recurso de inconstitucionalidade que o Partido Popular presentara contra o Estatuto de Cataluña. Dicía o procesualista uruguaio Couture que no Dereito o tempo é máis que ouro, é xustiza. E esta afirmación é plenamente valedeira para o caso que nos ocupa: nunca poderá ser compensada Cataluña –e, con ela, os demócratas galegos, vascos e españois– polo dano provocado polas dilacións do Tribunal Constitucional, máxime cando estas obedeceron a consideracións de conveniencia política. E nunca poderán tampouco os maxistrados –e con eles o PP e o PSOE– compensar os prexuízos inferidos ao prestixio da Xustiza e do Estado de Dereito españois.

E o caso é que o asunto tiña unha solución ben doada. Inadmitir a trámite o recurso por entender que o Estatuto de Cataluña, unha vez ratificado polo pobo catalán, fai parte do bloque da constitucionalidade e non pode, en canto que tal, ser obxecto de xuízo de constitucionalidade. Tal acontece noutros Estados compostos, sexan ou non federais, e así debería acontecer no Estado español se o PP e o PSOE asumisen a plurinacionalidade e atendesen máis aos valores democráticos do artigo 1 da Constitución –a liberdade, a xustiza, a igualdade e o pluralismo político– que á “unidade indisolúbel” da Nación española do artigo 2 garantida a medio do exército nun insólito, por inconcebíbel no constitucionalismo democrático, artigo 8. Mellor nos iría a todos, certamente, se se asumise que a convivencia debe asentar no consentimento e non na imposición. E por iso levan razón os partidos cataláns cando consideran gravísimo un fallo que se atreve a cuestionar o que Cataluña aprobara soberanamente.

E, porén, ao desestimar a maior parte das pretensións anulatorias do PP, o fallo abre para Galiza, unha oportunidade que faríamos mal en desaproveitar. Aínda descoñecendo os termos exactos da sentenza (e, con eles, o alcance preciso da segunda parte do fallo, aquela que condiciona a constitucionalidade de determinados preceptos a se interpretaren do xeito especificado nos fundamentos xurídicos) podemos concluír que o Tribunal Constitucional non elimina a referencia a Cataluña como Nación no preámbulo e admite que no articulado se faga referencia aos “símbolos nacionais” de Cataluña. Que avala a plena igualdade xurídica entre o catalán e o castelán e que o primeiro sexa, como lingua propia de Cataluña, a lingua normal e vehicular para os poderes públicos cataláns e no ensino. E que se confirma, en xeral, a constitucionalidade do alongamento e da blindaxe competencial operada através do Estatut de 2006 así como a regulación, bilateral, do financiamento e do novo marco de relacións entre Cataluña e o Estado.

Tócalle a Núñez Feijoo. É a súa vez. El que adiara até o fallo sobre o Estatuto de Cataluña calquera decisión sobre a elaboración dun novo Estatuto para Galiza ten agora que decidir. Decidir se vai ser responsábel de que o noso país fique nun estatus –canto a recoñecemento nacional, réxime lingüístico, dereitos, competencias e financiamento– inferior ao logrado por Cataluña ou se vai impulsar, como presidente de Galiza, a reforma que a maioría dos galegos e das galegas agardamos. Tempo non lle sobra.

Carlos Aymerich

lunes, 28 de junio de 2010

Guillerme esixe a abertura do Panteón de Galegos Ilustres e cualifica de indigno o comportamento de Feijóo

O portavoz nacional do BNG, Guillerme Vázquez, e a secretaria xeral de Galiza Nova, Iria Aboi, interviñeron hoxe á tarde nun acto público pola apertura do Panteón de Galegos Ilustres, en San Domingos de Bonaval. No acto, celebrado ás portas da igrexa, o líder do BNG esixiu á Xunta que adopte medidas para que o Panteón de Galegos Ilustres volva a ser aberto ao público e criticou a Feijóo “por non mover un dedo para liberar a Castelao e a Rosalía”.

“Rosalía e Castelao están secuestrados, vedados ao público”, afirmou o portavoz nacional. Unha decisión caprichosa do poder xudicial español permite que a Igrexa Católica recupere a propiedade sobre a Igrexa de San Domingos do Bonaval e a Igrexa tomou a decisión de fechar o Panteón, de clausurar entre catro paredes os nosos símbolos nacionais por excelencia, explicou.


Neste sentido, criticou que Feijóo “non move nin un dedo para liberar a Rosalía e Castelao”. “Imaxinemos por un momento que os norteamericanos non puidesen acceder ao monumento a Lincoln ou que aos franceses lles fose vedada a entrada a Des Invalides para ver a tumba de Napoleón, matinemos que acontecería en Catalunya se alguén se apropiase da estatua de Maciá ou que ocorrería se alguén podase a árbore de Guernica”, sinalou na súa intervención. “Non hai ningunha nación digna que puidese tolerar agresións desa envergadura ao seu patrimonio máis simbólico, a aquilo que os identifica como pobo, aquilo que os singulariza e lles dá personalidade”, dixo. “Por iso proclamo aquí, con toda solemnidade, que o Goberno galego -e en especial o seu presidente- non está actuando neste asunto coa dignidade que cabe esixir a quen é titular do poder executivo do autogoberno deste País”, afirmou.

Así, sinalou que “para os partidos estatais, Rosalía e Daniel continúan a ser figuras incómodas, non por nada, senón porque tamén os incomoda -e os enerva- a condición nacional de Galiza”. “Abrazar Rosalía e Daniel, permitir que os escolares por exemplo se acheguen a este Panteón, é tanto como abrazar a idea de que Galiza é tan nación como a que máis”, explicou.

“Non gostan de Rosalía e Daniel; en todo caso, están dispostos a aceptaren unha visión espartillada, simplificadora e manipuladora dos nosos símbolos nacionais, unha visión, por tanto, ocultadora das súas facetas emancipadoras”, dixo.

Espazo laico e público

Os cartaces foron pendurados das grades da porta principal do edificio
Para o líder nacionalista, “é preciso, pois, que a Xunta de Galiza tome cartas no asunto e adopte as medidas precisas para que o Panteón de Galegos Ilustres volva a ser un espazo laico e público”.

“O BNG é incómodo para os poderosos de hoxe, precisamente polos mesmos motivos que foron incómodos para as elites do pasado Rosalía e Daniel”, sinalou. “Rosalía e Daniel eran incómodos porque se enfrontaron resoltamente coas forzas reaccionarias que pretendían que nada mudase, que Galiza continuase sendo un país inconsciente de si mesmo, que as súas clases populares continuasen emigrando e sendo sangradas pola explotación e condenadas á miseria e á falta de instrución básica”, destacou.

“Nós somos tamén pobo galego, conscientemente galego, rebeldemente galego, e tamén nos enfrontamos resoltamente con forzas reaccionarias”, afirmou.

Deste xeito, Guillerme Vázquez lembrou que “tal día como hoxe, hai 74 anos, o pobo galego votaba a prol do seu primeiro Estatuto de Autonomía, 74 anos despois, a dereita española goberna Galiza e faino sen a menor ambición nacional”.

O líder do BNG subliñou que hoxe, igual que hai 74 anos, o nacionalismo continúa a ser a antítese da dereita reaccionaria española, a mesma que tolera o secuestro de Rosalía e Castelao.

Pola súa parte, a secretaria xeral de Galiza Nova, Iria Aboi, destacou que "pechando este Panteón pretenden pecharnos os ollos a Galiza, pechar a capacidade para termos memoria e aprender do pasado, mutilando a fonte da que bebemos no presente". "Para calquera pobo, e sobre todo para un pobo negado como é o galego, termos pasado, termos memoria, significa autoafirmarnos como nación que somos no mundo", engadiu.

martes, 15 de junio de 2010

190000 libros van ser tirados por estar en galego

190.000 libros de texto gratuítos para as familias, adquiridos polo goberno bipartito, van ir parar ao lixo, a pesar de teren unha vida útil de dous anos máis. Así o recoñece a propia Consellaría de Educación aos medios de comunicación que se fixeron eco da noticia. O motivo? Eses manuais están en galego e refírense a materias científico-técnicas cuxa docencia no noso idioma quere prohibir o goberno Feijóo a través do decretazo 79/2010.

Cómpre que a sociedade o saiba. Temos que movernos por riba das mordazas mediáticas do PP para que se coñeza que o presidente da Xunta ordena deitar ao caldeiro do lixo todos estes manuais, cuxo valor económico a Asociación Galega de Editores estima en 3,8 millóns de euros. Todos estes libros de texto non son substituídos porque houbese algunha descuberta excepcional neses ámbitos de coñecemento que os convertese en anticuados, nin porque houbese mudanzas no temario, nin porque tivesen erros pedagóxicos, nin por ningún outro motivo racional e comprensíbel. O único que lles acontece é que teñen un erro insubsanábel, un pecado orixinal: están escritos en galego, ese idioma que "por tradición" (Jesús Vázquez Abad dixit) non está feito para disciplinas como as matemáticas, a física, a química e a tecnoloxía.

domingo, 13 de junio de 2010

É hora de cambialo

Guillerme Vázquez: ‘Mellor sería que PP e PSOE gobernasen en coalición’

Nun acto de clausura do II Encontro Nacional de Pesca, organizado polo BNG en Santiago, Vázquez lembrou que a crise "repercute en todos, sexan ou non funcionarios" e asegurou que foi provocada "por unha ideoloxía neoliberal que puxo en valor a especulación fronte ao traballo".

"Estamos ante a sexta reforma laboral da democracia. E é evidente que esta tampouco vai servir para que todos e todas teñamos máis e mellores traballos", criticou o nacionalista.

Instou a sociedade galega a "pelexar a pesar das dificultades que se presenten", e criticou que esta reforma provoque "máis inestabilidade laboral, precariedade e menores salarios".

"De non pelexar polo futuro podemos perder moitos dos dereitos conquistados polos que non precederon, e habería que preguntarse que pensarían eles que loitaron tanto para chegar agora a esta situación", lamentou o líder nacionalista.

Por outra banda, Vázquez criticou as declaracións da conselleira do Mar, Rosa Quintana, nas que aseguraba que "como consumidora" non pagaría por un mexillón con "máis cuncha que carne", para demandar ao seu departamento de I+D+i que traballe coa fin de conseguir un mexillón "con máis vianda". Neste sentido, afirmou que o Goberno galego "é o que está a desprestixiar o sector, ao igual que fan co idioma galego,", achacou.

domingo, 6 de junio de 2010

Marcha contra Ence

Medio centenar de organizacións entre as que se atopaban os concellos de Pontevedra, Marín, Poio, Vilaboa e Bueu, confrarías de pescadores e colectivos sociais apoiaron a mobilización que partiu das alamedas de Marín e Pontevedra para unirse ante as instalacións da celulosa ante a ría de Pontevedra.

Durante o percorrido e ante a fábrica, custodiada por axentes da Policía Nacional, os manifestantes corearon lemas como “goberne quen goberne, a ría non se vende” e algúns dos participantes na marcha protagonizaron altercados coas forzas de seguridade.

O presidente do colectivo ecoloxista, Antón Maza, sinalou que “se o PP quixera eliminalo como di, antes do 2018 o primeiro que ten que facer é non renovar no 2011 as autorizacións ambientais integradas a Ence e Elnosa, que conbipartito se deron se xeito ilegar e irregular”.
A APDR considera que a posíbel concesión a Ence da licenza para instalar unha planta de biomasa é “un intento de consolidar o complexo máis aló do ano 2018”

Entre outros persoeiros, á manifestación acudiron o alcalde de Pontevedra, Miguel Anxo Fernández Lores e a tenente de alcalde, Teresa Casal. O rexedor de Pontevedra reiterou que a posición do Concello con respecto á celulosa é “clara e con pasos firmes para que Ence se vaia” e criticou que nas mocións municipais contra as concesións outorgadas á fábrica a corporación local non se ve “apoiada pola Xunta”.

Pola súa banda, Teresa Casal comentou que a situación de Ence na ría é “errónea e non ten ningún sentido”, polo que cualificou a situación actual “como un robo para os pontevedreses”, xa que se pretende crear unha zona para actividades lúdicas e deportivas da cidade.

Manifesto

A concentración rematou coa lectura dun manifesto a cargo da secretaria da APDR, María Peón, no que cualificou de “mediáticas e oportunistas” as declaracións dos dirixentes da Xunta respecto ao seu compromiso para que Ence se traslade como data límite no 2018. Peón asegurou que o colectivo ecoloxista ao que pertence estará “alerta” ante as “verdadeiras” intencións do Goberno galego.

Peón agradeceu o apoio social “continuo” e recordou que a APDR demanda o peche do complexo fabril antes de finalizar a concesión administrativa dos terreos.

A razón do nacionalismo

O portavoz nacional, Guillerme Vázquez, e o portavoz de Traballo, Industria e Comercio do BNG no Parlamento galego, Henrique Viéitez, ofreceron unha rolda de imprensa na Sede Nacional para valorar a sentenza 302/2010 do TSXG en que se avala o concurso eólico tal e como foi convocado pola Consellaría de Industria cando o seu titular era o nacionalista Fernando Blanco.

A sentenza nega os argumentos do demandante –Endesa- e cualifica de legal que no concurso puntuase como criterio de valoración que as empresas concorrentes ofrecesen á Administración galega unha participación accionarial nos parques eólicos.

A participación pública non era un requisito obrigatorio, senón só un criterio de valoración –que si é lexítimo primar en atención ao interese público- entre as distintas ofertas, o cal se axusta perfectamente a dereito.

“Como sustentamos desde o principio, por suposto que era legal e constitucional a participación pública nos parques eólicos”, afirmou Guillerme Vázquez, mentres Henrique Viéitez enfatizaba que o BNG desde o Goberno se ativera escrupulosamente á legalidade. “A sentenza veno demostrar e vén demostrar até que punto eran falsas as acusacións vertidas contra o nacionalismo por parte do PP”, alegou.

O líder do BNG foi máis alá e afirmou que a decisión do Goberno Feijóo de suspender o concurso eólico e de anunciar unha nova convocatoria “obedece a que son as grandes empresas do sector eléctrico as que ditan a política enerxética” do Goberno galego, sen que este teña en absoluto en conta “o interese xeral”.

"O PP PREPARA UN MEGAPELOTAZO"

“Cando o PP decidiu suspender o concurso eólico, algo que foi moi controvertido no seu momento, xa dixemos naquela altura que estabamos ante a intención clara de transformar ese concurso nun megapelotazo ao servizo dos seus amigos”, sinalou o portavoz nacional.

A paralización do proceso do concurso eólico foi “unha decisión irresponsábel do PP e iso nun contexto de crise económica como a que estamos a padecer faise máis evidente”, engadiu. “Quince meses despois non hai adxudicacións novas, segue absolutamente paralizado o proceso e tivo como consecuencia non somente que non se creasen novos empregos no sector, senón que desaparecesen entre 1.000 e 1.500 postos de traballo como consecuencia desta parálise”, sinalou Viéitez.

“UNHA SEGUNDA OPORTUNIDADE AOS SEUS AMIGOS”

Viéitez concluiu que coa suspensión do concurso eólico o que perseguía o Goberno Feijóo era darlle “unha segunda oportunidade aos seus amigos”, aos amigos “que se abrazaron na praza do Obradoiro, na toma de posesión de Feijóo”.