A Xunta anunciou onte que nos “vindeiros días” convocará a orde de axudas para a adquisición de libros de texto que cambian de idioma, do galego ao castelán, para o curso que empeza por mor do decreto do plurilingüísmo que aprobou en xuño. Esta liña de subvencións, que poderán solicitarse a partir do 1 de setembro nos centros públicos, “só afecta a matemáticas, tecnoloxías e física e química”, segundo especifica o Goberno, e van destinadas aos estudantes de 3º e 4ª de primaria e os catro cursos de secundaria.
O sistema será similar ao programa chamado de Gratuidade Solidaria, co que a Xunta di subvencionar os libros para apoiar "ás familias que están a pasar por maiores dificultades económicas". Porén, o cambio dos textos educativos para as materias que haberá que impartir en castelán vén derivado do decreto do ensino aprobado pola Xunta, que xa foi recorrido ante a Xustiza pola Real Academia Galega, a Mesa pola Normalización Lingüística e varios sindicatos do ámbito educativo.
PUBLICIDADE EN NOVEMBRO
Por iso, os grupos da oposición cualifican de "despilfarro" o gasto que suporá cambiar uns libros que aínda eran válidos para dous cursos máis e recriminan o "caos" que crea nos colexios este decreto, ao que a Xunta dedica un millón de euros a maiores para publicidade, con anuncios que non serán emitidos ata o mes de novembro polos trámites que hai que cumprir antes.
Tamén desde STEG (Sindicato de Traballadores e Traballadoras do Ensino de Galicia) se fala de "improvisación" e da "difícil xestión" que terán estas axudas para as direccións dos colexios, ás que se cargará "con máis traballo", asegura Xosé Cabido, e sen ter “ningún tipo de información”. O custo aproximado de cambiar os libros de texto para o vindeiro curso calcúlano en case 6 millóns de euros.
O portavoz de Educación do PSdeG, Guillermo Meijón, fai un cálculo similar, xa que fala duns dez millóns en dous anos, unha carga que se repartirá entre a Consellería e os pais e que está creando “un caos absoluto” previo á apertura do curso. “É unha frivolidade en estes tempos de crise facer esta falcatruada”, di, tras o que lembra a redución de profesores ou peche de centros que se está a facer.
Para a nacionalista Carme Adán trátase dun “despilfarro por unha cuestión ideolóxica deste Goberno, que quere fóra o galego das materias de ciencias”, algo que ademais é unha “incoherencia coa suposta austeridade” que publicita a Xunta.Recrimina que “van tirar todos eses libros”, en referencia aos textos que agora están en galego, e sinala que é en función dun decreto que “está recorrido” ante a Xustiza.
Por parte das editoriais, o presidente da Asociación Galega de Editores (AGE), Manuel Bragado, sitúa nuns cinco millóns de euros o custo para o sector de substituír os actuais libros de ciencias por outros en castelán. Segundo explicou nunha entrevista a Xornal, isto supón a cuarta parte dos 21 millóns que facturan estas empresas ao ano.
VALE NOS CENTROS
Os centros tramitarán as solicitudes no momento da matrícula ou posteriormente e entregará vales ás familias, que poderán adquirir con eles os libros de texto e o material escolar no establecemento que eles elixan e polo importe máximo que figura no documento, aínda que a Xunta non especifica cal vai ser.
Unha vez entregados os materiais, as empresas presentarán as facturas á Consellería de Educación para que lles sexan entregados os importes correspondentes aos vales tramitados.
No hay comentarios:
Publicar un comentario